标题：小娘舅
来源：新民晚报
作者：章慧敏
改写：丁迪蒙
诵读：李国琪
朋友笑我：人家是“我家的表叔数弗清”，侬屋里向是：大小娘舅弄弗清爽。
是个呀，我有得七个娘舅，扳扳手指头，一、两、三、四……啥人搞得清爽啊？不过，小娘舅柏平倒是我常庄挂垃嘴巴边浪个，讲得多了末，朋友也就“认得”侇了。
从小到大，我只叫侇“小柏平”，连辈份带名字合两为一。小娘舅呒没大我几岁，小辰光长短也差弗多。伊个辰光最盼望个是礼拜天快点到，可以去寻侇白相。
外婆屋里住垃江西中路一条叫宝善里个弄堂里，距离南京路、外滩搭仔城隍庙侪牢近个。搿些地方有无数个吸引小囡去个理由。每趟碰头，阿拉还有只固定个节目：到小人书摊去看小人书，一分洋钿一本或者两本，坐垃矮脚长条凳子浪、津津有味个读伊眼故事，我觉着自家对文学个爱好或许就是起因于小人书个启蒙。
小娘舅个学习成绩始终是垃及格个边缘，但就是搿个大人眼睛里向个“野蛮小*”，却是垃少年时代就显露出了会得养小动物个天赋。
侇养个鸡噢，就比人家个厉害呀，至少可以保证天天生蛋。左邻右舍羡慕煞了，常常要问侇窍门。小娘舅邪气得意唉，侇问邻居，?会得看蛋伐？侇拉弗晓得小囡也懂得优生优育。小娘舅对牢太阳光照喜蛋，千拣万拣，认真个样子噢，弗亚于搞科研。侇挑中一只，就交拨我一只，由我邪气小心个摆垃淘箩里。
我还看见小娘舅拿自家个一只生蛋鸡去搭人家调来一只“赖伏鸡”。搿只羽毛暗擦擦、翅膀耷拉垃海个老母鸡抱到屋里向来个辰光，呒没人弗讲侇戆呀，侇呢，悄悄叫搭我讲，侇拉侪戆唻，呒没侇，我哪能孵小鸡啊，呒没小鸡，啥地方来大鸡啊，再过廿几天，侬再听侇拉哪能讲。
伊个辰光，信息互通邪气难，我只好呆瞪瞪等垃海，盼搿只“赖伏鸡”快点孵出小鸡来，因为伊眼蛋里向也留有我个体温。
小娘舅养鸡，我邪气乐意做帮手。伊个辰光，粮食紧张，哪能可能用大米喂鸡呢？小娘舅经常带我到弗远个历史博物馆旁边个街心小花园去挖蚯蚓，摘皮虫。侇讲，小虫子是鸡鸭个人参。碰到树忒高个辰光，侇就蹲下来，让胖笃笃个我骑勒侇个肩胛浪，再摇摇晃晃立起来，我怕侇立弗稳，吓丝丝往下头看，看见个是侇个两只招风耳朵……事实证明，小娘舅养鸡果然来三，侇个“赖伏鸡”也真个是高产，人家孵鸡概率是60%，侇可以有80%。
无忧无虑个童年，一歇歇就过去了。“下岗”搿个名词刚刚出现，小娘舅就轮到了。亲戚朋友侪为侇以后个生活担心，侇却是大大咧咧个讲：“怕点啥？饿弗杀人个。”
下岗以后个小娘舅，经常到花鸟市场去摆摊头，侇搭人家削水仙。对侇恭敬个，水仙个花苞就一定多；要是对侇狠三狠四，水仙可能到了过年还是秃垃海。
小娘舅天生欢喜做“大好佬”，只要人家讲侇来三，侇就神兜兜了。秋天呢，是卖趱绩个旺季，小娘舅对各种“虫”侪邪气精通，侇个摊位前头从早到夜围满了交流搭仔取经个人。但是呢，来交流个，弗会来买“趱绩”个；要买个，看到里里外外侪是人，也就走了。本来好赚一笔个秋天就搿能落空了。
花鸟市场一圈生意做下来，辛苦得弗得了，却是进账弗多，送人个多。蚀本生意弗好做啊，只好回转来。但是侇又闲弗牢，硬劲勒自家屋里窗门外头、像搭积木一样搭出来一只两平方个简易棚棚，从配种、孵蛋开始，养芙蓉鸟。侇培育出莱个芙蓉，毛色红得漂亮啊，呒没一根杂毛。于是，侇养鸟个口碑又传开了。小娘舅靠“以鸟养鸟”个外快改善了生活，“孝敬”自家个子孙，吃支好香烟，垃烟雾当中获得了满足。
垃我个眼睛里，民间像我小娘舅搿能优缺点并存个人有弗少，侇拉侪活得邪气自在，或许搿个就是享乐人生之根本，幸福个人生也不过如此伐。
李国琪先生近影：
预览时标签不可点收录于话题#个上一篇下一篇